إلقاء: مظفر النواب

روحي ولا تگلها: شبيچ
وانت الماي
مگطوعة مثل خيط السمچ روحي
حلاوة ليل محروگة حرگ روحي
حمرية گصب
وعتبها هواي
لا مرّيت … ولا نشديت …. ولا حنيت
وگالولي عليك هواي
وعودان العمر كلهن گضن ويّاك
يا ثلج الي ما وچيت
تعال بحلم … أحسبها إلك جيّه واگولن جيت
يل عيناك فحل الگطا الگاطع چول
يلي شوفتك شبّاچ للقاسم
ودخول السنة من الگاك
يا فَيّ النبع واطعم
عطش صبّير ولا فرگاك
يل رهميت
يا مفتاح فضة ولا رهم غيرك عليّ مفتاح
واجوّتلك مخدتي وانطر الشبّاچ يجيبك
وانت عرس الليل والقدّاح
يا هلبت تجي وترتاح
واگعدلك على فراش العرس
بطرگ المسچ والنوم
عمر واتعده التلاثين
لا يفلان
عمر واتعدّه واتعدّيت
ولا نوبه عذر ودّيت
وانه والمسچ والليل وانت النوم
واغمّض عود اچيسك يا ترف
تاخذني زخة لوم
واگلك: ليش وازيت العمر يفلان
يفلان العمر … يشگر ولك يفلان
شيوگف العمر يفلان
وهجرك دوم
كل ليلة اشوفك بالحلم عرّيس
اگول اليوم
يحبيّب ... خلص خلگي واگول اليوم
ولا مرّيت ... ولا نشديت
ولا مرّة شلت عينك تعرف البيت
وگالولي عليك هواي
ورحت ابراي وجيت ابراي
حسبالي سنة وسنتين وتلاثة
واشوفك ذاك البگلبي … واضوگك ماي
ولك حسبالي الگاك ابن اوادم
يا شگلك … موش اشوفك هاي
ولا مرّيت ... ولا نشديت
ولا جيت اعله بالي
تبيع بيّه وتشتري بالسوگ
لا ما جيت
وگالولي عليك هواي
گالولي ...
گالولي ...
كَالولي